Eus Kobane da Afrin : derc’hel penn a ra ar gurded

Kanton Afrin perzh eus Rojava a oa meret gant ar melestradurezh emren bet lakaet e plas gant ar YPG/YPJ Kurd abaoe 2012. 360 kumun zo en takad ha ma ra ar gurded ar brasañ niver eus a boblañs e ranker kontañ ivez gant Arabed, Turkmened, Assyrianed ha Yezidied repuet aze. E kornog ar vro emañ Afrin dispartiet eus peurrest Rojava evel ma weler war ar gartenn (al lodenn c’hlas zo dindan beli Ankara hag an islamourien).

A-raok 2012 e oa ar vro dindan beli Damas, perzh eus stad Syria e oa neuze. D’an 21 a viz Geñver stad Turkia en deus kaset hec’h arme a-gevred gant lodennou eus “emsavidi” islamour (Al Qaida hag Al-Nosra) enebourien da c’halloud Damas. Fellout a ra da Erdogan gwanaat emrenerezh ar gurded er Rojava ha lakaat diaes war an dachenn vilourel ar PKK hag ar YPG/YPJ.

Ar wezh kentañ eo d’an arme Turk mont ken pell er Rojava gant ur sikour ken splann eus an islamourien ha diseblanted pe asant ar Stadoù-Unanet, Rusia ha Bro-c’hall.

Ar strolladou kurd armet YPG/YPJ o deus roet da c’houzout e talc’hfent penn d’o enebourien e Afrin evel m’o doa graet e Kobane. Peurrest an FDS (Nerzhioù Demokratel Syria) unvanet er stourm gante zo aet da dalbenn nevez Afrin.

Ar stourmerien etrebroadelour perzh eus ar BDE (Batailhon a Zieubidigezh Etrebroadel) o deus goulennet bezañ war an talbenn e Afrin ivez a-gevred gant ar volonterien etrebroadelour all. An holl strolladoù komunour emgouestlet er BDE (TIKKO/TKP-ML, MLKP, MKP…) o deus roet da c’houzout e vije enebet ouzh soudarded Erdogan e Afrin evel ma oa talet ouzh DAECH e Kobane. Un emgann pouezus meurbet e istor dieubidigezh Kurdistan eo.

Manifestadegoù a gengred gant Afrin zo bet hag a vo en deizioù e pep lec’h e Europa, evel e Breizh e Roazhon diwar atizh Keneildedoù Kurd Breizh da skouer hag ar gurded divroet, dindan ar ger stur “#AfrinIsNotAlone” .

Bez e c’heller ivez ober un donezon en linenn da harpañ ar stourmerien etrebroadelour zo war an talbenn, bretoned en o mesk.

https://www.youtube.com/watch?v=BmdVfBbCIG4